彰化基督長老教會 Changhua Presbyterian Church's Blog

講道：鄭凱安傳道師

題目：紀念悲傷、行向和平        

經文：馬太福音22章15~22節

耶穌挑戰耶路撒冷的權威

        佇耶穌受苦之前，當耶穌平平靜靜啲騎驢子（lû-á）行入耶路撒冷聖殿之後，便開始挑戰聖殿內的權威，面對不仝款的宗教、政治意識型態的宗教領袖，當然此大群宗教領袖及政治領袖給耶穌當作是仝一個對敵，in作夥參詳怎樣辯倒耶穌，準備欲抓他的縫來控告他、給他定罪處死。面對此款大大的危險及權勢，耶穌知影此條路真窄、真歹行，但是為著真理，他bōe當無行；為著上帝國，他必須顯示互眾人明白怎樣是上帝國的審判。

       從《太》21章開始記載，當耶穌來到聖殿後，到《26》章之前，佇這一大段連續的辯論中，是充滿非常厚厚的火藥味。所以佇經文的大脈絡中，佇耶穌受苦之前的辯論顯明，宗教領袖一直啲挑戰耶穌基督的權柄與來源，然耶穌也反轉用智慧及比喻挑戰宗教領袖in的心意咁有合佇上主的旨意抑無。

        佇今仔日所揀的經文，有一個真趣味的現象；因為法利賽人與希律黨佇政治上的立場極不仝款。法利賽人自己認為是尚正統的猶太人，納稅互皇帝是侵犯上帝的主權，因為納互皇帝著表示認同羅馬皇帝佇政治及宗教的影響，簡單講就是啲拜皇帝啊；若是啲拜皇帝著違反上帝十條誡的第一條：「除了我以外，你呣通有別的上帝。」

        另外一方面，希律黨是加利利王希律的部下，in的權柄從羅馬來，一定與羅馬政府合作，強求人民納稅給羅馬皇帝。若是無納稅，著表示無認同羅馬帝國的政權，是實質上啲反抗羅馬政權。按呢，羅馬帝國著有理由派軍隊來鎮壓處死反抗的人。

       這個問題的趣味及困難就佇遮，耶穌回答好抑是呣好都對兩邊無滿意；若是應好，一定會受著正統猶太人的喊罵；回答嘜納稅，嘛會陷入希律黨的陷阱。

反省台灣的國家處境   

       佇咱台灣也是仝款，咱口袋所拿的零錢、鈔票也攏是印著這個政府所認定的領導者，這是政府所表明的意識形態，互眾人攏知道，這個土地的老大是啥人？總是，咱現在所面對的國家體制，咱咁有用基督信仰啲檢視咱自己所降服的國家的意識形態？這個體制咁有用合適的政策啲管理、保護咱的教育、法律、經濟、土地環境、生命安全以及人民本有的權利？

        佇今仔日總會所訂的「終戰紀念日」，是為著欲轉化過去國民政府臺灣省長陳儀所設立的10月25日光復紀念日。為著互咱面對現實，這個日子呣是表面看起來許呢光彩，它的背後其實有真多悲傷的故事發生佇台灣，所以終戰紀念日一方面是欲紀念過去第二大戰所帶來的傷害，亦地紀念佇10/25了後續佇台灣所發生的互人心痛的代誌，就是228事件。

藉終戰紀念日、228反思台灣的未來

        不過，咱要用真嚴肅的態度來看待這些實際發生佇咱過去的故事，常常會有真多人用「省籍情結」地概念化228事件。如果咱無去理解過去歷史所帶來的意義，便會互228的概念更加模糊、不清楚，甚至會影響人民關心政治的實際目標。政治本就是任何發生佇咱生活中的大小項事，咱若是無去實際了解咱自己土地所發生的代誌，有可能，彼種國家用看做是合理化的暴力對人民直接的傷害，此種類似的悲劇猶原會繼續發生下去。

        咱來稍微對比今仔日的經文，耶穌來到耶路撒冷呣是欲為著來咒詛聖殿，而是彼種「恨鐵不成鋼」的心情，來勸勉這些與對上主的信仰教導完全不同的宗教行為，因為這些無好宗教行為也實際上影響人民的生活。所以，他從上主所領受的教導與啟示，深入關心猶太地區的信仰及生活，實際走入人群，帶互人生命有尊嚴、有盼望、有能力會當自己倚靠主來面對世界社會的挑戰。彼種從內心發出的原動力，正是互人尋找到上主的完整形象，擱願意照按呢來做。

        所以耶穌他對這個社群有責任、有期待、有盼望、有感情、有理性、也有更新的活命，鼓勵、勸勉他身邊所作夥生活的人，擱一拜來尋找上主所意愛咱的款式。

        咱此群跟隨耶穌基督的人也是按呢，基督徒要對國家的責任，也要對上主有責任。表明基督徒對上主的責任用具體的實踐行動佇地上生活，來見證他對上主的責任。若是當咱的領導者做出違背上主旨意的時，基督徒就應該表明立場，不可模稜兩可，或是兩邊討好； 著要用疼及勇氣，來互社會更加合佇公義、平安及歡喜。

ＰＣＴ的信仰前輩

        咱常常會謳咾過去台灣基督長老教會所做的偉大故事。親像設立咱彰化教會的甘為霖牧師，他為著目睭看無的人，耳空聽無的人，佇台南設立學校，互in會當用手看書、看聖經，來摸著此個世界，像時也摸著上主。

        擱來，咱彰化地區最熟的一句話「南門媽祖宮，西門蘭醫生」，為著漢生病的人，互這些病人有通治療、生活的空間；佇彼物資欠缺的時代，擱建立彰化基督教醫院，一面關懷病人、一面傳揚福音；受到老父的典範影響的蘭大弼醫生，佇戰後來重建彰化基督教醫院，繼續透過醫療來見證基督，in的家庭攏完全奉獻互彰化地區，用洗腳的精神一生服務在地。

        最近，互咱擱重新記憶著台灣基督長老教會的〈人權宣言〉，40年前，1977年，咱長老教會及政府的關係有真緊張的時陣，最近才剛回到天厝的翁修恭牧師，也是咱彰化人，他與一群願意為著台灣犧牲的牧師以及台灣長老教會的信頭，為著台灣的在地困境，佇面對政府的恐嚇以及危及生命的過程，作夥合作寫出〈人權宣言〉，向世界表明台灣的艱難，盼望會當成作新擱獨立的國家。

        這些的故事真正是了不起，這些歷史的見證擱一遍互咱認知，咱台灣基督長老教會的領導者是用犧牲的精神、焚而不毀（hûn-ji-put-húi）的信仰態度，來帶領眾教會，這就是咱台灣基督長老教會的特色。

        來問列位兄弟姊妹，可能攏會互別人問一個問題，咱的台灣基督長老教會的特色是什麼？咱的特色與信仰價值就是顯示佇咱平常所讀的〈台灣基督長老教會信仰告白〉，可能咱攏會認為它真長，總是咱自己成作台灣基督長老教會的一份子，咁有認同這份信仰告白？這份信仰告白是佇1985年總會通過的一份文件，要知道，佇彼時代，台灣猶是活佇戒嚴時期；所以要知道要宣布此條文件，是有可能要面對生命危險的。

        所以，當咱啲宣讀這份文件時，這是過去的信仰前輩為咱佇臺灣的教會所留下的目標與盼望，此時咱著要覺醒，要有清楚的認知，咱台灣基督長老教會著必須要成作國家政府的先知，一定要成作國家政府的典範，有這些典範才能引導國家，而不是佇許痴痴地等待國家要有什麼作為。當咱聽到有需要的人啲哀叫，若是咱呣作，誰欲來做？

        咱的要知道教會是有先知的角色，親像耶穌仝款，對咱自己生命開始挑戰用基督信仰挑戰自己，若是教會群體攏有這種意識，著一定會當來引導咱的國家—台灣。

上帝國超越地上國

        所以佇今仔日的經文，耶穌提醒上帝國是大大超過地上的國，總是此個前提是，咱咁願意作夥起造上帝國？咱對信仰的認知，更加應該對上主的本質來學習、實踐，來延續耶穌基督佇地上所建立的上帝國。其實上帝國呣是佇遠遠的天頂，就在佇咱此時此刻的手中，只有佇咱若是願意按呢作夥行，上帝國著佇此時此刻開始建立。

        咱著要重新思考〈台灣基督長老教會信仰告白〉的特色與信仰價值，上主呼召這些教會著實實在在對本土在地的關心，若是咱若無作夥用此款信仰態度啲作，是欲按偌喊宣教？

        最近很流行一句話，無有人是局外人。確實，佇這塊土地上，無有人是局外人。對每個生活佇台灣的人，對台灣的主體意識會當講是非常多元，每個人都來自不仝的血緣、民族，總是，咱攏是親像活佇一個小船上，如何共同生活、互相尊重，認同咱自己所住的土地。

        佇今仔日的故事會當知道，宗教信仰絕對跟政治有關係，然而基督信仰卻呣是為著掌控權力來關心政治，而是關心自己所徛的土地來實際關心人的生活，當〈人權宣言〉至今已過了40年，咱咁猶原對咱的土地有責任？如果咱若是對自己的土地無有仝一個願景、無去用神學來反省自己，咱永遠攏會活佇互人控制的現實生活中；若是按呢，此個土地的人的內心，會變得愈來愈自私，我只要管好我自己，別人的代誌及我無關係。

        著親像《腓》2：4所講，「恁逐人莫得顧家己的事，也著顧別人的事。」

        今年，有許多國家用不仝的日子啲記念終戰70年，佇咱十月初也是有用「世界聖餐主日」來紀念世界所發生的戰爭。無論當時哪一國是勝利或是失敗，都啲反省過去的歷史，避免人類擱一拜踏入這種悲慘的歷史。

      「凱撒的（khái-sat）著歸凱撒，上帝的著歸互上帝」，不只提醒咱，上主的主權大過國家、政治之制度，上帝的主權更是關係每一個人大大小小的生活層面；會當知影，上帝互咱的使命就是欲呼召咱去用基督信仰的態度來關心養飼咱長大的土地，特別台灣基督長老教會的信仰價值更是如此。

        所以對咱成做台灣基督長老教會的一份子，佇今仔日更積極的目的，就是歷史的教示著要記互膠，總是呣是一直停留佇過去的怨恨與傷害；而是致意佇社會中成做和平的子女，親像耶穌為著咱人的軟弱以及罪惡，獻出生命，並歸榮光佇上帝。 願咱做基督徒的人，會當用疼及勇氣來見證上帝國的降臨佇地上親像佇天裡，願咱作夥繼續寫出會當互人感動的故事。