彰化基督長老教會 Changhua Presbyterian Church's Blog

講道：鄭凱安傳道師

 題目：腓立比書二章1~13節                 

經文：滋潤枯焦的心 

一、腓立比書成書背景與目的

   《腓立比書》會當稱作「保羅互基督徒的合一憲章（hiàn-chiong）」，幫助信仰團契相及和睦生活、彼此合作，來共同面對眼前的困難。 當咱去深入認識保羅先生的用詞，會當發現腓立比教會與保羅有真深厚的感情，如親像自己至親朋友的關係；不只是因為保羅親手所建立的教會，腓立比教會也時時為著保羅的需要，提供他真大的幫助，無論保羅佇宣教的路程、休息、甚至為福音的緣故受關監，腓立比教會的關心，實實在在互保羅先生得著真溫暖的安慰。

二、腓立比教會的對外困境

    這間腓立比教會本身面對真多挑戰。佇腓立比地區的百姓，對羅馬皇帝的敬拜真火熱；因為羅馬皇帝對在地的人民有真好的作為，所以在地的人民認為皇帝對人民有恩，in著為著皇帝起真多的廟來敬拜羅馬皇帝。總是保羅提醒腓立比教會，只有主耶穌基督才是唯一救贖咱人類的永遠的救主，無有別的君主比耶穌基督擱卡大了，未來也無。

會當知影，在地的腓立比人認為這間腓立比教會不合群，無作夥來拜羅馬皇帝，在地的人著對這間教會有明顯的敵意及拒絕。所以，保羅著安慰腓立比教會，雖莽會互社區厝邊的人歹對待，總是鼓勵in為主繼續忍耐、著磨，不致到放棄而失去氣力。 

三、腓立比教會的對內困境

    大約佇主後60年，保羅受羅馬政府關監的期間，他接到從腓立比教會來的消息，其中有一個代誌互保羅非常傷心，就是腓立比教會的兩位領袖，友阿蝶（Iú-o-tia）和循督基（Sûn-tok-ki）的爭吵造成彼此的分裂，影響著基督徒家庭的基本價值―「和諧與合一」。 其實這兩位女性領袖佇教會非常的認真打拼，保羅也曾與in同工服事過，所以保羅真清楚這兩位姊妹的性情及能力。所以當保羅聽到此兩位姊妹為著事工的緣故互相煩家、對立，實在互保羅真不甘。

        所以保羅聽著此個消息，馬上著佇監獄內底寫《腓立比書》互腓立比教會，給in講，著要用「內在的合一、支持、鼓勵、援助」，才會當共同面對教會目前的困境。如果教會內部無有這些元素，著算偌有規模、有制度的教會，人及人之間無有互相支持的關係，即使是一粒小小的石頭丟過來，這看起來真強大的堡壘（pó-lúi）也會因為小小的原因著崩去啊。所以，保羅藉著腓立比教會的處境，同時來勸勉兩位姊妹友阿蝶及循督基，為著教會的處境來想，佇主的裡面相及勸勉、包容及照顧。

        保羅佇《腓》1：27有講「用像（siâng）一個心志徛在，同心作夥為著所信的福音拍拼。」，《腓》2：2講「恁著有像款的心志、像款的疼心、和諧的感情、一致的想法」。咱會當來思考，怎樣是像款？怎樣是和諧？怎樣是一致？怎樣是同心？怎樣是像一個心？此個「一」的標準就是「以基督的心做心」，而且作夥佇主內底同心，來用基督的心做心（腓4：2），這就是咱的主耶穌為著咱世間人犧牲的目的，不是嗎？所以著要問咱自己，「我咁有與咱教會所有的兄弟姊妹作夥用基督的心做心來彼此謙卑服事？」

四、世界聖餐主日之緣起

    佇1933年，美國當啲面對經濟大蕭條、真稀微的黑暗時期，而且歐洲擱受蓋佇納粹（la̍p-chhùi）與法西斯主義的陰影（im-ńg）中，連帶互整個世界，攏受著真嚴重的衝突、戰爭及死亡的威脅。

對按呢，美國匹茲堡榭迪賽德長老教會（Shadyside Presbyterian Church）的牧師（Rev. Dr. Hugh Thomson Kerr）克爾牧師佇當年十月、第一個禮拜日，佇教會舉行聖餐禮拜；同時呼籲世界的眾教會也會當透過聖餐的舉行，來記念主耶穌基督的疼及救贖之恩典，來見證上主佇政治、經濟、人民生活上的主權，藉以祈求世界的和平。

續克爾牧師提出「世界聖餐主日」了後，此款對立、破碎的威脅猶未結束，因為第二次世界大戰馬上著欲發生。佇此窘迫的時刻，美國長老教會有一群關心世界的領導者，in為著追求世界和平，嘜擱互人類因為自己的私慾及無知所引起的戰爭，受著災害滅亡的危機。

這些領導者續跟隨克爾牧師所發出的聲音，來呼籲世界所有的基督教會，無分彼此、無分宗派，團結一致、共同認罪悔改，為著將欲發生殘忍的戰爭，來懇求上帝的憐憫；同時鼓勵普世的基督教會，會當作夥舉行聖餐禮拜，展現出普世合一的信仰表現。

佇彼年1940年10月6日的聖餐禮拜也剛剛好佇十月第一個禮拜，所以從彼日開始，美國基督長老教會正式施行「世界聖餐主日」，並舉行聖餐禮拜，到今，已經經過77週年（2017）。

所以成立「世界聖餐主日」之後，衛理公會等等教派也作夥舉行世界聖餐主日，為著世界的動亂來懇求和平，作夥用上帝子女的身分，盼望耶穌基督的救贖，來滋潤世界人類枯焦、驚惶擱悲傷的心。第二大戰（tāi-chiàn）結束了後，教會為著人類所遇著的各種問題及災害，猶原持守世界聖餐主日設立彼種起初的心志，繼續佇每一年10月第1個主日舉行聖餐禮拜，直到今日也是按呢。

五、聖餐所表明的意義

    佇今仔日的世界聖餐主日，無有「吃的聖餐」，總是咱也會當反省的意義，成作養飼咱內心的聖餐，滋潤咱內心的枯焦。

聖餐的意義，親像今天的經文《腓》第2章6-8節所講：「伊原本有上帝的身份， 卻無濫用及上帝平等的地位。伊反轉摒空家己， 取奴僕的身份， 出世及人仝款， 用人的形體出現。 伊自願謙卑， 順服到死— 甚至死佇十字架頂。 」耶穌猶原佇此時刻認同所有的人類群體，將自己完全獻作活祭。

    咱著必須要擱一次的承認，咱是罪人，也包括我自己。只有彼此認同與接納，才有可能合一。若無，咱所信的信仰一切著攏淪為「嘴講的」而已！主耶穌的死也對咱無擱有意義了。

    所以透過世界聖餐主日，邀請列位兄弟姊妹來回想，到底，主耶穌排列最後的晚餐是有什麼意義呢？。當主耶穌受苦難前晚，主耶穌為祂的學生擘餅、分杯、洗腳，是耶穌最後一次給這些學生預告，他馬上著欲面對連耶穌自己也真ó承受的患難，總是咱咁有清楚這些加添互耶穌的患難是從叨位來？這些甘苦不只包含逃走的學生、宗教領袖的毀謗、民眾的指控聲勢，也包括人及人互相指責定罪、驕傲做大，這些現象攏發生著祂身邊所有的人；甚至會當講，其實包括咱自己，嘛是其中一員。佇這些連續的叫罵、批評、戲弄的聲音，不斷啲傳入耶穌的耳孔與心內，這些聲音、行為成作祂為咱背負的十字架。

        總是，耶穌基督甘願為著咱眾人造成的傷害、指責、輕視、罪過，著親像釘子釘佇祂的手、祂的腳及祂的心，來承受咱所加添的痛苦，是最bōe見誚的死。 祂的受苦，卻互眾人作夥仰望這位釘佇十字架頂彼位猶太人的王、世界的王、也是咱彰化教會的君王。

你可能會講，彼位人有罪，耶穌卻講：「我為他承擔你所指責的」

你可能會講，你所行所做是最正確的，耶穌卻講：「我是道路、真理、生命」

    所以耶穌佇此晚為這些學生擘餅、分杯、洗腳，擱給in講：「恁著行按呢來紀念我」，這個意思不是獨獨「舉行聖餐」來紀念主耶穌而已；是佇咱平常的生活，用與咱的救主耶穌基督像款的心志、性情以及行動，為著咱的厝邊及對敵來破碎自己，以及分享自己的生命，也成作奴僕替咱的厝邊及對敵來服事。

    佇今仔日的經文是啲謳咾耶穌對人類表現的疼與寬容。基督是顧別人的利益，贏過自己利益的至高模範。耶穌並無利用自己至高的地位來為自己圖謀；而是順服上主，完全摒空自己成作人類，走入人群中作夥服事、生活。 所以，受耶穌拯救的人，更無應該互別人承認自己是群體中是做高的，反倒轉要除去一切的自高及自私。

   《腓》1：27講，「只要咱的言行舉止著要符合基督的福音。」咱所有的生活焦點必須集中佇基督， 不只是將基督看作是救主，著擱要看作是基督徒生活的典範。

    咱咁有意識咱平常聖餐所吃的聖餅、葡萄汁，其實是主耶穌基督為著咱這些罪過受打、互人chàm、噴口水、擱流血兼流眼淚，所成作重價的恩典？

    現在，我邀請大家來為著自己的心神、性命來反省。佇此個空間的群體，咁猶有什麼人，是咱自己所看作無歡喜的？咱咁有順服佇主耶穌的教導，成做主的奴僕，謙卑服事咱的厝邊、包容咱的對敵？擱講，咱咁有意識著咱彰化教會的困境？

    咱著將這些上主看作是不好的心意及動機，變作是悔改的祭，也是耶穌基督為咱打破的肉體，來共同體會耶穌怎樣為著咱這些罪來受苦。

《馬太福音》5：23-24講：「所以，你若啲獻你的禮物佇祭壇，也佇遐記得你的兄弟姐妹有甚麼脅嫌你，著佇遐放下你的禮物佇壇前，代先去及你的兄弟姐妹和好，然後來獻你的禮物。」

   •咱來靜默反省，將咱的心思意念成作咱心內的祈禱。

  •  咱來透過聖歌隊所唱的〈以基督的心為心〉，將這首的歌詞來成作咱的祈禱。

    願主耶穌為咱所做的犧牲與獻祭，會當成做甘甜的水泉，滋潤咱每一個人有受傷的所在，互咱重新及人復和、也及上主復和。當咱面對試煉時，主耶穌會及咱相及佇啲，咱就無需要擱煩惱，因為會當透過祈禱親近上主，上主也一定會賜互咱有平安的心，支持咱繼續向前行。