講道：鄭凱安傳道師
題目：以賽亞書六十四章3~9節
經文：主行咱所無拍算的事
今仔日的主日是待降節的第二主日，咱咁有準備自己？用信心來接受上帝對咱的救恩？你可能會問講，上帝的救恩當然嘛好，所以我當然有信心。不過，我所欲問的是，咱咁願意開拆咱的內心，可能有黑暗、怨恨、嫉妒、貪心、自我、憂悶等等，互這些咱內心世界的事，將主權交互上帝來引導、醫治，將咱自己的自我放下，謙卑接納上帝的教導，互咱愈來愈親像祂一樣。
《以賽亞書》的歷史意義
佇今仔日所讀的《以賽亞書》64章啲講起，以色列的歷史怎樣互上帝揀選，總是人所做的代誌常常呣是上帝所期待的。會當講以賽亞的話語佇受掠的時代、失敗憂傷的時代扮演一個真重要的角色。
以賽亞書所記載的歷史，經過真多的國王，有烏西亞、約旦、亞哈斯、希西家，這些領導者其中有好有歹，所以領導者的態度對一個國家的影響非常大。佇歷史的記載顯示上帝的選民、上帝的子女—以色列人，常常佇好過日的時陣，作出為著自己的意思、私慾、利益，最後攏得著應該受著的報應。
上帝過去不斷啲顯明自己，擱一拜啲與祂的百姓同在，向in啲講「我佇遮！我佇遮！」著親像一位老父抑是老母，啲期待in的子女會當轉來祂的胸前，互祂抱啲。上帝一直啲抄尋祂所意愛的子女，親像佇葡萄樹中啲尋著結出「媠的葡萄」一樣。上主意願復興這些好葡萄，就是這些忠誠的奴僕。
所以佇先知以賽亞宣告的話語中，上帝所呼召的對象不擱限制佇以色列人中間而已，而是見若任何所有願意尋求上帝的子女，就是願意佇生活中學習謙卑、施行公義、分享恩惠、實踐和平、用憐憫赦免辜負in的人。 這些人，是上帝所欲大大賜福的，in的生活是充滿知足，佇生活所有的層面充滿喜樂；雖罔佇過去的見誚、患難中間悲傷憂悶，不過上帝會佇in中間施落喜樂，互in有新的生活。
所以這個過程其實不是咱所想像中許呢簡單，親像老母啲生子仝款會真痛、會流眼淚，但是此位有母性的上帝，祂盼望祂的國度著親像他的子女，會當生產出來、建立徛起了後，甚至聽到這些子女的呼喊，親像啲謳咾運行上帝創造的活命。
超越人想像的先知信息
先知的信息一直攏是啲代表上帝的信息，是上帝透過先知來傳報、宣告；如果先知，只要有一部分為著自己的利益與權柄講話，著會當講這是假先知。
先知是上帝用來向以色列和其他國家傳到信息的工具，in所承擔的是一種與社會有關的職務。是實際關心國家社會的角色，也是呼籲信仰群體也能實際關心自己所徛起的土地啲發生的代誌；而非只是關心自己的飲食，抑是自己的生活好壞而已。
會當看著《以賽亞書》64章所描寫的，雖然先知仰望上帝的審判會當親自降臨佇此不公義的世間，總是先知也知道，上帝的行動是超越咱人所想像的，時時行出咱所無拍算的事。為著要互咱知影，此世間的主權源頭是上帝，咱人只是藉著祂的呼召來管理此世間；總是咱咁有用謙卑的心好好使用祂所互咱的職分與恩賜？親像64章第六節所講的「阮攏親像無清氣的人；所有的義攏親像污穢的衫。阮攏親像樹葉漸漸乾去；阮的罪過親像風給阮吹去。」
有一位美國詩人艾蜜莉‧狄金生（Emily Dickinson）講到真好：
「著要出全部真理，但是未使直講—
成功之道，在佇轉徙到真理的原點，
咱軟芷的肉體，
未堪得承受真理彼種過分華美的偉大，
親像用逐逐的解釋講明，來解除囝仔對sih-nah的驚惶；所
以，真理的光只會當按呢漸漸照光透射，
抑無，所有的人著攏會青瞑」
上帝一直用超越咱所想像的行動，互咱看著淡薄的微光，照射佇咱頭前的路站；總是，常常佇黑暗的情景，咱咁願意向此個微光來行？行出互上帝榮耀的道路？
台灣的勞工休例議題
對最近勞工的作工與休息的議題，咱關心有偌多？
佇咱的教會有人作主管、也有人作勞工。佇仝一個群體中，有多多不仝款的角色，總是咱咁有互相看作自己的肢體一樣？
佇摩西律法第七條「不可偷提」，這項律法不只是啲說明不通偷提別人的物件財產而已，甚至啲針對人口買賣以及人力的壓迫；如果頭家互他的員工負擔過重，擱表示如果恁若不加班，為著公司單位增加業績，就給恁廢除掉。用按呢的威脅來偷提基層人員的生命尊嚴，這樣的行為也是啲破壞上帝所賜互每一個人的生存尊嚴。甚至，若是啲恥笑、忽略有欠缺、有需要的人，就是汙辱創造他的上帝，所以維護人權實踐同是也是啲維護上帝主權。
所以親像摩西律法第七條誡命啲提醒咱，佇現代的臺灣社會環境，到底咱咁有啲維護人性的尊嚴？咁有啲保護人性的尊嚴？透過教會的生活與教導，從咱自己的群體生活開始，來互相照顧、互相關心，不只是透過代禱的言語而已，而是實際理解咱的兄弟姐妹的心聲。漸漸，咱的教會也開始關心咱出去的工作場所、家庭生活、學業與工作的壓力等等。
咱的信仰生活應該呣是獨獨注重自己的幸福感而已，上帝互咱的使命目標永遠攏是用行動佇關心社會，以及咱的厝邊。
以賽亞的呼召
以賽亞一生追求上帝的聖潔，以及上帝榮耀國度。 以賽亞此個名字的意思是「救恩屬佇上帝」，亦作「上帝是救恩」，所以《以賽亞書》爲咱顯示上帝攏無棄拺咱，因為祂是咱永遠的拯救。所以咱信仰群體的生活亦著要回應祂的救恩，按呢的關係才會稱作「聖潔的約」。
而且，所有順服上帝治理的人有福啊！這些人成作新的群體，作伙成作「萬民祈禱的殿」；這個聖殿不是具體的空間，抑是一個建築物，而是一群願意順服上帝的心意，行出對上帝忠誠的表現。總是這些敬拜行為，不是獨獨固定來到教會聚會、奉獻金錢、唱好歌聲而已，而是從咱的生活去關心上帝所關心的、憐憫上帝所憐憫的、接納上帝所接納的，著透過咱的行動行出真正謳咾上帝的生活。
罪佇信仰群體中間是有互咱變作黑暗的作用，因為聖約的本質與福份親像藏在雲霧的中間；上帝的百姓若無行公平與公義，任何許的尋求解救、抑是受應允的祈禱、抑是受祝福的國度就無法度臨到。 這是對意願欲尋求上主的信仰群體來講，是非常嚴重的警告與勸勉。咱成作基督的跟隨者，無應該只有「基督徒」這個身分，更要注重咱自己咁有「基督的形象」？當大家都真注重「基督徒的身分」。
最後，咱要清楚認知自己的角色與身份，咱無法度靠咱自己來創作上帝所意願的國度，著要有共同的異象及願景，來抄尋上主的心意；可能有遇著困難及失敗的經驗，親像老母生產中的困難與痛苦；總是感謝主上帝，祂會扶持這些遵行上帝使命及命令的人，祂會一步一步教導咱來學習主上帝的智慧與愛疼。
佇待降節的節期中，咱的救主耶穌基督用咱所無拍
算的行動完成這些救恩，而且此款救恩不限制佇某一個群體，著親像咱的台灣基督長老教會信仰告白所講，「是普世的，擱釘根佇本地，認同所有的住民，通過疼及受苦，來成做盼望的記號。」無論咱出佇什麼背景、什麼群體，佇基督內底，咱攏受著上帝的救恩應允裡面。 願咱此時刻開始用警醒、準備的態度，以及用超越咱罪惡的信心，來經歷上帝的平安、公義、愛疼、自由擱真實的的生活。
留言列表
見證分享 (4)