講道：鄭凱安傳道師
題目：蒙赦免的心
經文：路加福音七章26~28、47~50節
從聖經看到不平等的女性地位
佇《聖經》不少地方，攏會看著女性的角色與聲音可能互受蓋起來、受輕視。親像咱真熟的故事—耶穌用五個餅、兩條魚飼飽「五千人」，不過這是無包括女性與囝仔的數目；敢講，在場真正無有女性與囝仔嗎？抑是女性佇當時的社會觀念，無互人看作是人？是看作財產？是次等的嗎？
擱有，親像十條誡的最後一條啲講：「呣通貪你的厝邊的厝；也呣通貪你的厝邊的某、奴僕、女婢、牛、驢，以及你的厝邊一切所有的。」佇此只有看到女性，無看著男性，親像給女性當作是查晡的財產，與奴僕、女婢、牛、驢等等看作是一類，將女性當作是隨人拾起、放落的一類。按呢，此款的觀念咁有對「每一個人」做出最基本的尊重？這咁是基督信仰所要帶出的觀念？此句應該也要包含「也呣通貪你的厝邊的丈夫」，夫妻之間著要互相看作彼此所有的，會當互相尊重，也會當互相包容。
耶穌、法利賽人與抹香膏的婦人
今仔日所講的經文，耶穌受著一位名作西門的法利賽人的邀請，邀請耶穌來西門的厝內坐桌用餐。此時，有一位婦仁人聽講彼位會醫治人的病痛、趕鬼的耶穌，來到此位法利賽人的厝裡吃飯，著馬上入別人的厝，直接跪落佇耶穌的腳前，一面哭、一面親耶穌的腳、擱用香膏啲抹耶穌的腳。
當主人西門看著此個情境，心內馬上判斷這個婦仁人一定有什麼問題，除了黑白入別人的厝內，婦仁人所表現的行為嘛一定是做過什麼歹的代誌，並來引起耶穌的注意。主人西門擱啲想，若是耶穌是先知，著知影這位婦仁人是罪人，他一定bōe當與她接近，因為她是罪人，所以bōe當與任何有罪的人接近，免得受著無清氣！主人西門也佇此給耶穌看輕，無認定耶穌是上主所差派的先知，像時啲看耶穌互這位有罪的婦仁人所做的代誌。
難道真是一位有罪的婦人嗎？
對一位婦仁人所做出的動作，咱會當明顯看著真多的對比。到底是誰才是罪人？到底是誰才最有資格評判別人？到底是誰才是真正的聖潔、清氣？
呣知列位兄弟姊妹對這位婦仁人有什麼款的第一印象？為什麼互法利賽人看作是有罪的人？若是真正是有罪的人，她擱做了什麼代誌，互人看作是有罪的人？
佇過去30年前神學的解釋上，真多男性的聖經學者若呣是給這位婦仁人看作是一位妓女，著是給這位婦仁人頭頂放此號「罪人」的標籤，對她作出真多的負面想像，指出此位用香膏抹耶穌的婦仁人是一個放縱私慾的犯罪者。甚至in講，彼款過分啼哭的模樣一定是與性有關係，所以可能因為彼種見笑著發出對自己的指責與痛悔。擱講，她擱用嘴親一位生分的查晡人這件代誌，著認為她是一位淫亂的人。若是按呢看，著算這件代誌換作是一位查晡人，即使in也有啼哭抑是其他與淫亂有關的罪，嘛無親像這位用香膏抹耶穌的女性仝款，得到按呢的極大侮辱。
佇此，我呣是欲去挑戰《聖經》所描寫的文字，而是咱咁有意識著咱會常常將自己的文化、觀點讀入聖經裡面，從《聖經》得著的回應，可能只是藉著咱自己的解釋，可能咱無去檢討著自己，反轉更加加強咱自己的觀點啲批判別人。若是當啲面對不仝觀點的人，一定會遇著衝突，因為逐人所描述的上主也攏無仝款。若是咱無意識到按呢的情形，有可能咱永遠只會看到基督信仰一部分的面貌，也可能無清楚看見《聖經》所傳達的自由、公義、和平、喜樂所代表的意義。
宗教改革反思信仰實踐
佇最近10/31剛滿宗教改革500週年，佇今年有發出一項呼籲，咱咁有啲檢討自己？抑是獨獨啲檢討別人而已？
佇1517年10月31號，因為多多人已經對羅馬天主教的集權掌握，控制聖經的詮釋，歪斜信仰的行動，馬丁路德將〈95條論綱〉釘佇德國的威登堡大教堂的大門上面，對當時天主教權威來講，這是非常嚴重踩到天主教的信仰權威。其實，當時馬丁路德本身也是天主教徒，可惜的是，當時與教廷之間的對話的空間與時間並無足夠，著按呢造成兩邊的傷害，馬丁路德也受到天主教教廷的除職，不擱是天主教的會員之一。
總是，馬丁路德是爲著基督信仰及教制啲努力，並提出質疑及改善的方式；他呣是為著反對天主教來反對，而是為著追求信仰與真理互教會會當愈來愈好。不過，當已經脫離天主教的信仰團體，後來這些跟隨馬丁路德的人成作路德宗的教派。當in啲慶祝宗教改革一百年、兩百年、三百年、四百年的時，攏是用反抗天主教成作慶祝的動機，日後反轉作出迫害天主教徒、猶太教徒等等任何in看無慣習的代誌。此樣的意識形態，轉化作德國大部份的民族意識；甚至此款的民族意識與神學立場，變作二次大戰的主角—納粹的恐怖行動，發生屠殺600萬的猶太人。佇此款的慘忍悲劇，互咱看著基督徒會常常將基督信仰來符合自己的思想主體，卻呣是將「基督信仰」成作「生命的主體」，互咱來反省自己、檢討自己。所以，當時對抗納粹的德國神學家潘霍華啲講：「如果給上主排除在外，人的良善及世界的美好擱有什麼意義？」
耶穌的赦罪行動
所以，咱會當接續來看，耶穌怎樣來回應此位主人西門他彼種先入為主的想法。耶穌著用一個比喻講，記載佇41節到42節：有二個人欠一位債主的債（chè）；一個人欠伊五百個銀仔，另外一個欠伊五十而已；總是，兩個人攏無能力通還錢，債主就赦免in二人。按呢，叨一位人卡疼債主啊？
佇遮有一個趣味的所在，耶穌呣是啲問「此位債主卡疼叨一位人？」，反轉是啲問「叨一位人卡疼此位債主？」更加趣味的是，此位法利賽人西門也講對耶穌所意愛的答案。因為論結果，兩個人都赦免了；總是到底是什麼原因，互債主願意赦免彼位欠五百個銀仔的人？五百個銀仔代表非常重的重價，會當講天文數目。總是，此位欠真多的人作出互債主感覺非常感動的代誌，亦互債主感受著她深深的疼，彼款從內心做出許呢真實的回應、許呢真實的懇求。敢講，此位債主猶原bōe赦免她嗎？
所以耶穌佇此個時刻就越頭向婦仁人，給西門講：「你看見此個婦仁人無？我受著你的邀請來坐桌，入你的厝；而且你是這間厝的主人，你竟然無用通常的禮俗款待請人來用水互我的腳洗清氣；何況此位婦仁人是用多多的目屎來滴tâm我的腳，用自己頭殼頂的頭毛拭我的腳。」
耶穌擱對主人西門講：「你無給我親；獨獨此位婦仁人從我入來的時，著親我的腳無息。你也無用油抹我的頭殼；對比這位婦仁人是用香膏啲抹我的腳，互我的雙腳有香香的氣味。所以我給你講，伊多多的罪過已經赦免，因為伊內心的疼是多，若是得著赦免少的，伊的疼也是少。」
若是一個人深深感覺她對上主有欠缺的，此個人著會多多用生命為主服事，亦bōe看她自己所有的，因為她深知，著算她有所擁有的，她深知這亦是上主所互她的大大恩典，這著是此位婦仁人所發出的蒙赦免的信心。
所以，耶穌就給婦仁人講：「妳的罪已經赦啦。」
此時，同桌的人心內啲講：「此個啲赦罪的是甚麼人。」
耶穌對婦仁人講：「妳的信有救妳；做妳安心倒去！」
耶穌不只知影這位婦仁人的處境，擱赦免她，互她有滿滿的平安。
常常咱對「罪」這個字非常的敏感，總是咱可能只知道罪，卻不知道「歹」是什麼。 咱一直啲佇「罪」的字眼上，互它無限的想像；卻沒有試啲發現，一個人啲渴慕互人理解、互人同理、互人重視、互人看見；但是，咱常常只注意到「他有罪」！
總是，咱對耶穌的行為會當看著，他並馬上無去判斷此號人是好是歹，耶穌互咱學習他怎樣去分辨頭前的處境，了解此位有欠缺的人需要什麼，給她引導、陪她行到真正的活命中間，而且活出有尊嚴、信心的生命。
尊重上主所創造的一切生命
今仔日是總會所定的「性別公義主日」，互咱去意識著咱自己的文化觀念，攏會淡薄仔對男女的觀念都有一些差別與性別偏見。 不過，每一個生命攏有他的主體意識，著要尊重每一個獨立個體（kò-thé）的人格尊嚴。
互咱看著，無有人有完美的標準會當去批判別人、定義別人、甚至控制別人。但是咱會當學習對所有的人看著上帝的形象，提醒咱自己擱有什麼不夠的所在；也互咱看著每一個生命多元的發展性。
當咱啲讀經文、靈修的時，必須要真小心自己咁有有帶有某種偏見或是立場，而且從經文中來強化自己的觀點之合理性。因為按呢的作法，確實造成歷史上許多的悲劇，無論是對買賣奴隸的正當性、抑是將女人看作次等的角色，抑是將自己當作是佔領別人土地的開拓者等等，這些歷史攏是利用基督信仰所支持的對象。《聖經》所發出的啟示絕對無有偏向哪一種人，反轉是互眾人透過《聖經》的挑戰與教導來認識上主。
咱若是清楚認識自己的軟弱與不足，透過上主的恩典，互咱有蒙赦免的信心來行出上主意愛的款式，透過耶穌基督的款式來教導咱來認識咱厝邊的需要，互相包容、赦免彼此的辜負，互咱眾人得著完全的平安與和平。
上主佇創世之前所存在的真道，藉著耶穌基督的肉體來到咱眾人的中間，用活活的生命與咱作伙經驗生老病死，以及互咱面對真多不仝款的衝突來學習和平，互咱有真大的安慰會當知影：著算是許呢微小的人，也是會當藉著耶穌基督的恩典活出真實的生命。
留言列表
見證分享 (4)